Палатачны Лагер"Алімпіец"
14 чэрвеня выхаванцы палатачнага лагера "Алімпіец" здзейснілі экскурсійную паездку ў палацава-паркавы ансамбль "Нясвіж". Дзеці даведаліся аб тым, што тэрыторыя палацава-паркавага ансамбля "Нясвіж" пачынаецца каля ўвахода ў Замкавы парк. На сённяшні дзень зялёны ансамбль уключае ў сябе 5 паркаў: Замкавы, Стары, Японскі, Англійскі, Марысін. У Замкавым парку мы прагуляліся па алеях, якія цягнуцца ўздоўж дамбы і берага абарончага рова. Асаблівасцю Старога парка з'яўляецца багацце скульптур. Тут усталяваны помнік сабаку, які нібыта выратаваў князя на паляванні ад раз'юшанага мядзведзя; скульптуры "Музыкант і анёл"; "Чорная дама"; "Русалка". Мы прайшліся па Алеі памяці, на якой пастаўленыя бюсты дзеячаў, звязаных з горадам: князёў Юрыя Нясвіжскага і Мікалая Хрыстафора Радзівіла Сіроткі, гравёра Томаша Макоўскага, архітэктара Яна Марыі Бернардоні, паэтаў Уладзіслава Сыракомлі і Якуба Коласа.
Падчас экскурсіі дзеці пазнаёміліся з гісторыяй узнікнення замка, вядомымі прадстаўнікамі рода Радзівілаў, іх укладам у развіццё і станаўленне замка, легендамі і паданнямі помніка архітэктуры.
Акрамя таго, мы не пакінулі без увагі брацкую магілу савецкіх воінаў і партызан на тэрыторыі парку Нясвіжскага замка. Тут пахавана 135 воінаў і партызан, якія загінулі ў баях супраць нямецка-фашысцкіх захопнікаў у 1941-1944 гадах, або памерлі ад атрыманых ран у шпіталі з 1944 года па 1945 год. На магіле ўсталяваны помнік-скульптура воіна з аўтаматам. Каля скульптуры ўстаноўлены стэлы з імёнамі загінуўшых, ля падножжа пастамента гарыць Вечны агонь. Выхаванцы лагера ўшанавалі памяць загінуўшых мінутай маўчання.
Экскурсія не пакінула нікога абыякавым, усе атрымалі незабыўныя ўражанні.
