Нясумныя канікулы
Як нясумна правесці канікулы? Адказ ёсць у дзяцей, якія з 1-га па 26 чэрвеня наведвалі лагер працы і адпачынку "Энергія будучага" на базе дзяржаўнай установы адукацыі "Жухавіцкая сярэдняя школа".
У першай палове дня хлопцы і дзяўчаты працавалі ў СВК "Жухавічы": займаліся відавой праполкай, уборкай тэрыторыі.
Пасля працы выхаванцам быў дадзены час для адпачынку, а затым праводзіліся мерапрыемствы па розных кірунках выхаваўчай працы: брэйн-рынг "Мая Беларусь", квэст-гульня "Бяспечны Інтэрнэт", дзелавая гульня "Экалагічны аўкцыён", гульня-падарожжа "Фальклорная мазаіка", выхаваўчае мерапрыемства "Пад добрым парасонам сям'і", квэст-гульня "Знаўцы дарожных правілаў" і інш. Былі арганізаваны экскурсіі па значных месцах раёна. Так выхаванцы лагера наведалі пакой баявой Славы ДУА "Лукская сярэдняя школа", а ў рамках рэспубліканскага экскурсійнага марафону "Дзіцячы аўтацягнік" 21 чэрвеня - філіял Гродзенскага лікёра-гарэлачнага завода "Мірскі спіртзавод". Яны азнаёміліся з гісторыяй завода, тэхнічнай базай, а таксама з асноўнымі напрамкамі дзейнасці прадпрыемства.
Выхаванцы з задавальненнем наведвалі лагер, бо тут яны з карысцю правялі час, размаўлялі з сябрамі, аказвалі пасільную дапамогу базавай гаспадарцы, атрымалі мноства станоўчых эмоцый, а яшчэ зарабілі свае першыя грошы.
Надзея Венскевіч, выхавальнік ЛПА "Энергія будучага" ДУА "Жухавіцкая сярэдняя школа"
